អត្ថន័យព្រះធម៌(អត្ថន័យកំណាព្យ និពន្ធដោយព្រះសង្ឃវត្តអង្គតាមិញ)

អត្ថន័យព្រះធម៌

( បទផ្កាឈូករីកពាក្យ ៨ )


១. ធម៌ជាប្រទីបបំភ្លឺដួងចិត្ត ធម៌ជាអម្រឹតសែនត្រជាក់ណាស់


ធម៌ជាសូរ្យសែងចែងចាំងយ៉ាងច្បាស់ ធម៌ជាអ្នកដាស់ជនដែលងុលងប់ ។


២. ធម៌ជាមាគ៌ាដ៍ថ្លៃបវរ ធម៌ជាទិន្នកររ:ទាំងថ្ងៃយប់


ធម៌ជាទឹកឃ្មុំរសផ្អែមលើសលប់ ធម៌ជាទីម្លប់នៃសត្វគ្រប់ប្រាណ ។


៣ ធម៌ជាអ្នកញុំាងឲ្យចិត្តស្កប់ស្កល់ ធម៌ជាអ្នកផ្តល់នូវក្តីសុខសាន្ត


ធម៌ជាមិត្តល្អបវរកល្យាណ ធម៌ជាអ្នកច្រាណឲ្យចាកកម្មពៀ ។


៤ ធម៌ជាសភាវទ្រទ្រង់សត្វ ធម៌ជាអ្នកកាត់ភាពអវិជ្ជា


ធម៌ជាអ្នកទាញឲ្យមនុស្សសាមគ្គា ធម៌ជានាវាដ៍រឹងមាំមួន ។


៥ ធម៌ជាឧសថព្យាបាលដួងចៃ ធម៌ជាទ្រព្យថ្លៃគួរដាក់តាមខ្លួន


ធម៌ជាអ្នកខាត់ចិត្តឲ្យសមសួន ធម៌ជាច្បាប់ក្បួនសម្រាប់សត្តា ។


៦ ធម៌ជាអ្នកជួយឲ្យចិត្តខន្តី ធម៌ជារស្មីដ៍ថ្លៃស្រស់ថ្លា


ធម៌ជាអ្នកខាត់សម្អាតតណ្ហា ធម៌ជាជលសាស្រោចស្រប់ជីវិត ។


៧ ធម៌ជាអ្នកស្ទួយឲ្យផុតអបាយ ធម៌ជាអ្នកស្រាយក្តីទុក្ខសោកពិត


ធម៌ជាជម្រកនៃជនបណ្ឌិត ធម៌ជាផងមិត្តល្អរកស្មើគ្មាន ។


៨ ធម៌ជាអ្នកប្រាប់ឲ្យស្គាល់ខុសត្រូវ ធម៌ជាដងផ្លូវទៅកាន់និព្វាន


ធម៌ជាអ្នកនាំឲ្យចេះធ្វើទាន ធម៌ជាគឿងយានជិះឆ្លងភពត្រៃ ៕

ភ្នំពេញ ថ្ងៃទី ១៥ ខែ សីហា ឆ្នាំ ២០១២

                                     

ព្រះគុណម៉ែ

បទជាប់ទងពាក្យ ៩

១    ពេលបុត្រស្ងួន                    នួនពន្លក                       មកចាប់ផ្ទៃ

      ម្តាយវាងវៃ                         លៃថ្នមថែ                      ស្នេហ៍បុត្រថ្លៃ

      ខំពពោះ                            មោះមុតចិត្ត                   ផ្តិតនិស្ស័យ

      លំបាកក្រៃ                         ថ្ងៃនិងយប់                    គ្រប់វេលា ។

២   ពោះសែនធ្ងន់                     គ្រុនងុយងោគ                រោគជាប់កាយ

      តែអ្នកម្តាយ                        ខ្វាយខ្វល់ទ្រាំ                 មាំពុះពារ

      ភ័យរញ្ជូយ                         ព្រួយខ្លាចកូន                 សូន្យជន្មា

      គ្រប់វេលា                          ជាឈឺក្តី                        ខ្មីរក្សា  ។

៣   លុះដល់ថ្ងៃ                         ថ្លៃកល្យាណ                  បានគ្របខែ

      ផ្ទៃអ្នកម៉ែ                            ប្រែក្រឡាប់                   ចាបឈឺផ្សា

      ប្រសូត្របុត្រ                       ស្លុតស្លេកស្លាំង              តាំងចិន្តា

      ស្រក់នេត្រា                        ផ្សាក្រៀមក្រំ                  ខំបំរាស  ។

៤    ញ័រដង្ហក                            ស្រក់លោហិត                ដិតដាមហូរ

      គួរអាសូរ                            ផ្ងូរយំយែក                    រែកទុកក្រាស់

      យំខ្សិកខ្សូល                       អួលព្រួយព្រឺ                  ឈឺពេកណាស់

      ភ្លេចអៀនខ្មាស់                   ច្រាស់ច្រាលចិត្ត             ឥតល្ហែល្ហើយ  ។

៥    ពិបាកម្លឹង                          ប្រឹងត្រដរ                      ប្រសូត្រកូន

      ស្ទូចសណ្តូន                       ក្បូនចម្លង                      ឆ្លងដល់ត្រើយ

      ម៉ែរំភើប                             ងើបក្រសោប                 ឪបកៀកកើយ

      មិនកន្តើយ                         ហើយបីបម                   ថ្នមនែបនិត្យ  ។

៦    បំបៅស្ងួន                          នួនមាសម្តាយ                កាយនៅក្បែរ

      លោហិតម៉ែ                        ប្រែទឹកដោះ                   ប្រោះជីវិត

      ទោះហេវហត់                     អត់កម្លាំង                      ស្លាំងស្លេកពិត

      តែម៉ែគិត                            រឹតស្រឡាញ់                  ខ្នាញ់បុត្រភ្ងា  ។

៧   ថើបជញ្ជក់                         ញក់ញីលេង                  គេងប្រឡែង

      ខំខ្នះខ្នែង                           តែងបីបម                      ថ្នមគ្រប់គ្រា

      ច្រៀងបមពេរ                      គ្នេរគ្នន់ថែ                      ស្នេហ៍បុត្រភ្ងា

      រាល់វេលា                          នាគ្រប់គ្រឹក                   នឹកបុត្រម្តាយ  ។

៨    ម៉ូតលាមក                         គក់ខ្មីឃ្មាត                    ឆ្លៀតសម្អាត

      ប្រឹងសង្វាត                        ឆ្លាតវាងវៃ                      លៃខ្វល់ខ្វាយ

      ដេកដើរគិត                        ពិតជាប់ចិត្ត                   ឥតរសាយ

      មិនជិនណាយ                    ម្តាយរំពឹង                      ប្រឹងពេកក្រៃ  ។

៩    ពេលកូនយំ                        ងំរញ្ជួយ                        ព្រួយចិន្តា

      ស្ទុះស្រវា                           ថ្លាថ្លេងល្បូង                  លួងបុត្រថ្លៃ

      ញ័ររំពើក                            លើកក្រសោប                ឱបផ្ទាល់ដៃ

      ក្នុងដួងចៃ                          ក្រៃសន្តោស                  ប្រោសប្រណី  ។

១០ ម៉ែបីព                               ឈរស្នាលសិ្នទ្ធ              ឥតមានហ្មង

      ចិត្តបន់ផ្សង                        ប៉ងឲ្យបាន                    ថ្កានសុខី

      ម៉ែសង្រោះ                         ទោះលំបាក                   យ៉ាកម្តេចក្តី

      ខំឃ្មាតខ្មី                            ស្តីទូន្មាន                       ប្រៀនប្រដៅ  ។

១១ កូនកើតទុក្ខ                        មុខម៉ែក្រៀម                  បៀមទុក្ខធំ

      ជួនម៉ែយំ                            ងំរញ្ជួយ                        ព្រួយសោកសៅ

      ទឹកចិត្តម៉ែ                          ស្នេហ៍បំផុត                   បុត្រឆោមឆៅ

      ខ្លាចកូនខ្លៅ                        ហៅហាមប្រាម              តាមច្បាប់ក្បួន  ។

១២ ម៉ែខ្នះខ្នែង                          ស្វែងលៃលក                 រកលុយកាក់

      គិតប្រចក្ស                         ប្រាក់ម៉ែខំ                      ផ្សំខ្ជាប់ខ្ជួន

      ឲ្យកូនរៀន                         មានចំណេះ                   ចេះមាំមួន

      បុត្រមាសស្ងួន                    ខ្លួនខ្ពង់ខ្ពស់                   ហួសរន្ធការ  ។

១៣ ម៉ែរែកពន់                          ធ្ងន់នឿយហត់                អត់រ៉ែរ៉

      ទោះមានក្រ                        ត្រដរទ្រាំ                       មាំហានក្លា

      យាប់ក៍ដោយ                      ឲ្យតែពៅ                       នៅសុខា

      ព្រះមាតា                           ហានេត្រូ                       ហូរញើសប្រាណ  ។

១៤ ម៉ែរឹងប៉ឹង                            ប្រឹងឆ្នាស់ឆ្នើម                ដើមបីកូន

      ស្ទូចសណ្តូន                       ក្បូនចំឡង                    ឆ្លងកល្យាណ

      ម៉ែជាគ្រូ                             សូប្រៀនប្រិត                 ឥតខកខាន

      បុត្រគ្រប់ប្រាណ                  បានខ្ពង់ខ្ពស់                  រស់ព្រោះម៉ែ  ។

១៥ លុះបុត្រស្ងួន                      នួនកល្យាណ                 បានពេញវ័យ

      ម្តាយរំពៃ                            លៃរៀបចំ                      ផ្សំគូស្នេហ៍

      រៀបគូគាប់                         ភ្ជាប់គូស្និទ្ធ                    ឥតកែប្រែ

      ទ្រព្យផងដែរ                       ម៉ែបំបែក                       ចែកបុត្រភ្ងា  ។

១៦ ម៉ែស្ម័គ្រស្មោះ                     ប្រោះជីវិត                     ពិតមានគុណ

      ធ្ងន់សែនធ្ងន់                       ពន់ពែកក្រៃ                   ថ្លៃសោភា

      បុត្រកុំស្ពឹក                         នឹកតមស្នង                   សងគ្រប់គ្នា           

      ខំម្និសម្នា                            ព្យាយាមទៅ                  នៅធ្វើអ្វី ៕២៨/​ ៨/ ២០១២

បទបក្សីកាងស្លាបពាក្យ៧

មេរៀនជីវិត


១ ប្រឹងរករកប្រឹងកុំទំនេរ គ្នាន់គ្នេរគ្នេរគ្នាន់ឲ្យប្រពៃ


ខ្មីឃ្មាតឃ្មាតខ្មីបែងលកលៃ ឆ្លាតវៃវៃឆ្លាតត្រិះរិះគិត ។


២ ក្រខ្សត់ខ្សត់ក្រព្រោះមិនខំ លត់ដំដំលត់កាយចិត្តពិត


យើងគួរគួរយើងខំប្រព្រឹត្ត ស្វែងគិតគិតស្វែងកុំរ៉ែរ៉ ។


៣ ធនទ្រព្យទ្រព្យធនដែលខំរក លៃលកលកលៃទុកឲ្យល្អ


យើងត្រូវត្រូវយើងចេះស្មោះស បោកឆឆបោកនាំអបាយ ។


៤ ស្នេហ៍ស្និទ្ធស្និទ្ធស្នេហ៍គួរតែមើល កុំព្រើលព្រើលកុំនាំអន្តរាយ


ស្មោះគេគេស្មោះមិនក្លែងក្លាយ ផ្ញើកាយកាយផ្ញើនឹងក្សេមក្សាន្ត ។


៥ ម្រាក់ក្លើក្លើម្រាក់រាក់ទាក់រាប់ ល្អគាប់គាប់ល្អមិត្តកល្យាណ


យើងរាប់រាប់យើងនឹងសុខសាន្ត ពិតបានបានពិតក្តីសុខា ។


៦ ពុកម៉ែម៉ែពុកត្រូវគោរព ថ្ងៃយប់យប់ថ្ងៃលៃឧស្សាហ៍


គន់គិតគិតគន់មុនវាចារ ស្តីថាថាស្តីស្គាល់ហេតុផល ។


៧ លុយចាយចាយលុយកុំរាត់រាយ ខ្ចះខ្ជាយខ្ជាយខ្ចះលះឥតសល់


លៃផ្សំផ្សំលៃគិតឲ្យដល់ ខ្វាយខ្វល់ខ្វល់ខ្វាយរក្សាវា ។


៨ រស់នៅនៅរស់កុំប្រមាថ ចិត្តស្អាតស្អាតចិត្តស្និទ្ធធម្មា


ស្នេហ៍ញាតិញាតិស្នេហ៍គ្រប់វេលា ផុតពៀរពៀរផុតលែងភ័យព្រួយ។


៩ សាងបុណ្យបុណ្យសាងល្អឥតខ្ចោះ ស្ម័គ្រស្មោះស្មោះស្ម័គ្រកុំរលួយ


ថែជាតិជាតិថែប្រឹងលើកស្ទួយ លៃជួយជួយលៃទើបថ្កើងថ្កាន។


១០ ស្រាស្រីស្រីស្រាបើលេងជ្រុល ងប់ងល់ងល់ងប់ក្នុងសន្តាន


គ្មានសុខសុខគ្មានហ៊ានសនិដ្ឋាន ចិត្តប្រាណប្រាណចិត្តស្អិតទុក្ខា។


១១ ខឹងក្រោធក្រោធខឹងប្រឹងអត់ទ្រាំ មុតមាំមាំមុតក្នុងចិន្តា


ឈ្លោះទាស់ទាស់ឈ្លោះនាំហឹង្សា ខ្លោចផ្សាផ្សាខ្លោចជាដំណំ ។


១២ ព្រះធម៌ធម៌ព្រះសែនល្អក្រៃ ថ្លាថ្លៃថ្លៃថ្លាសិក្សាផ្សំ


យើងត្រូវត្រូវយើងរៀនលត់ដំ ប្រឹងខំខំប្រឹងអប់រំខ្លួន ។


១៣ ដើរផ្លូវផ្លូវដើរតាមពាក្យព្រះ ចាកលះលះចាកក្តីគុំកួន


ខាត់ចិត្តចិត្តខាត់ឲ្យសមសួន ​ ​ ច្បាប់ក្បួនក្បួនច្បាប់ស្តាប់គោរព។


១៤ ពោលពាក្យពាក្យពោលកុំកុហក លួចឆក់ឆក់លួចគួរតែឈប់


ព្រះធម៌ធម៌ព្រះពិតជាម្លប់ ថ្ងៃយប់យប់ថ្ងៃលៃប្រៀនប្រិត ។


១៥ បើកចិត្តចិត្តបើកឲ្យទូលាយ វិចស្ពាយស្ពាយវិចសាងសុចរិត


ទ្រព្យក្រក្រទ្រព្យកុំក្រចិត្ត​ ស្នេហ៍ស្និទ្ធស្និទ្ធស្នេហ៍ញាតិគ្រប់ប្រាណ ។


១៦ ឆ្មើងកុំកុំឆ្មើងឡើងអំនួត ក្អេងអួតអួតក្អេងមិនប្រមាណ


ស្លូតត្រង់ត្រង់ស្លូតទើបក្សេមក្សាន្ត ពិតបានបានពិតក្តីសុខជា ។


១៧ ស្អប់គេគេស្អប់ចិត្តថ្នាំងថ្នាក់ បែកបាក់បាក់បែកភាពសាមគ្គា


ប្រឹងស្វែងស្វែងប្រឹងតាមពាធា ចងពៀរពៀរចងផ្សងចង់ឈ្នះ ។


១៨ ខ្លួនខុសខុសខ្លួនត្រូវចេះកែរ ប្រួលប្រែប្រែប្រួលកុំមានះ


ត្រាប់រៀនរៀនត្រាប់តាមធម៌ព្រះ ចាកលះលះចាកចិត្តអប្រិយ ។


១៩ គេខុសខុសគេត្រូវមេត្តា ហានក្លាក្លាហានតែខន្តី


ឈ្លោះទាស់ទាស់ឈ្លោះបានផលអ្វី ជេរស្តីស្តីជេរនាំអាប់យស ។


២០ ស៊ូទ្រាំទ្រាំស៊ូកុំខឹងក្រោធ ល្ងង់ឆោតឆោតល្ងង់រករឿងឈ្លោះ


កើតពិតពិតកើតក្តីរងគ្រោះ ស្អុយឈ្មោះឈ្មោះស្អុយលែងកល្យាណ ។


២១ កាប់ចាក់ចាក់កាប់សម្លាប់គ្នា មានពៀរពៀរមានឥតស្រាកស្រាន្ត


ចិត្តខ្មៅខ្មៅចិត្តដូចតិរច្ឆាន ធ្លាក់ប្រាណប្រាណធ្លាក់ទៅអបាយ ។


២២ ខំប្រឹងប្រឹងខំយកឈ្នះចាញ់ ខ្មួលខ្មាញ់ខ្មាញ់ខ្មួលឆួលក្រហាយ


គិតខ្លីខ្លីគិតមិនវែងឆ្ងាយ ប្រែក្លាយក្លាយប្រែបែរងងឹត ។


២៣ ចិត្តខ្លាំងខ្លាំងចិត្តឬក្សខែងរែង ស្វាត់ស្វែងស្វែងស្វាត់ចងពៀរពិត


កើតទុក្ខទុក្ខកើតក្នុងជីវិត នៅនិត្យនិត្យនៅឥតស្រាកស្រាន្ត ។


២៤ យើងត្រូវត្រូវយើងយកឈ្នះខ្លួន មាំមួនមួនមាំល្អកល្យាណ


រស់នៅនៅរស់នឹងក្សេមក្សាន្ត ពិតបានបានពិតក្តីសុខា ។


២៥ យើងខ្មែរខ្មែរយើងត្រូវសាមគ្គី មូលមីមីមូលកុំប្រេះឆា


ថែធួនធួនថែជាតិខេមរា ថ្លៃថ្លាថ្លាថ្លៃតរៀងទៅ ៕


បទពាក្យ ៨


ធម្មជាតិជីវិត


១ រឿងរ៉ាវជីវិតពិតហួសរៀបរាប់ មានច្រើនសន្ធាប់ជាប់ដោយបញ្ហា


ព្រោះតែចំណងចងគឺតណ្ហា ចំណង់ប្រាថ្នាពុំដែលចេះស្កប់ ។


២ ហេតុតែរោគឃ្លានហ៊ានឈ្លោះកាប់ចាក់ គំគួនថ្នាំថ្នាក់ខឹងប្រកាន់ស្អប់


លូតលាស់បន្តកកើតមិនចប់ រស់ឥតសូវស្ងប់ក្នុងភពជីវិត ។


៣ សុខហើយនិងទុក្ខនៅលាយឡំគ្នា ភាពចាស់ជរាតែងវិវត្តន៍ពិត


លោភ:ទោស:ដិតដាមនេបនិត្យ កិលេសរួមរិតជុំជិតសន្តាន ។


៤ មនុស្សខំខ្នះខ្នែងស្វែងប្រឹងពេកក្រៃ ទាំងយប់ទាំងថ្ងៃត្បិតចង់សុខសាន្ត


ប្រាថ្នាសក្តិយសរស់នៅថ្កើងថ្កាន ល្ហែល្ហើយចិត្តប្រាណផុតទុក្ខគ្រាំគ្រា ។


៥ កម្មផលវែកញែករំលែកឥតខ្ចោះ ឲ្យមនុស្សទាំងអស់រស់ខុសពីគ្នា


ខ្លះមានលុយចាយសប្បាយធូធា ខ្លះរស់វេទនាដុនដាបក្រក្រី ។


៦ ដំណើជីវិតពិតឥតទៀងទាត់ ជួនជួបជួនព្រាត់ទាំងប្រុសទាំងស្រី


កើតហើយនឹងស្លាប់ចាប់ភពជាថ្មី រស់លើដែនដីនៃវដ្តសង្សារ ។


៧ អន្ទោលទៅមកគ្មានទីបញ្ចប់ វិលវល់ត្រឡប់គ្រប់ៗរូបា


កើតហើយស្លាប់វិញជារឿងធម្មតា កម្មផលអ្នកចារដាក់ទីទាបខ្ពស់ ។


៨ បើវក់សប្បាយក្លាយដល់ភ្លេចគិត នោះក្នុងជីវិតពិតជារងគ្រោះ


ខូចកេរ្តិ៍អាស្រូវត្រូវធ្លាក់ក្នុងជ្រោះ ស្អុយអស់កេរ្តិ៍ឈ្មោះរស់លេងប្រពៃ ។


១០ ពេលមានធនទ្រព្យលម្អឆើតឆាយ លុះដល់សូន្យកាយក្លាយជាឥតន័យ


បើមិនសាងបុណ្យនឹងជួបទុក្ខភ័យ ឆ្នេះគួរលកលៃគិតគូឲ្យច្បាស់ ។


១១ ព្រះធម៌ដ៍ល្អបរិសុទ្ធសមសួន ជួយដឹកនាំខ្លួនយើងឲ្យល្អល្អះ


គួរឈប់បំពានហ៊ានធ្វើផ្តេសផ្តាស់ ព្រះធម៌ល្អណាស់តែងជួយស្រង់សត្វ ។


១២ កន្លងឆ្នាំចាស់ផ្លាស់ចូលឆ្នាំថ្មី ជនទាំងប្រុសស្រីគួរប្រុងប្រយ័ត្ន


ព្រះធម៌មាននូវត្រូវបដិបត្តិ ព្យាយាមដុះខាត់ចិត្តឲ្យថ្លៃថ្លា ។


១៣ ដឹកនាំជីវិតគិតតាមវគ្គស្នើ កុំប្រឹងហោះហើរដើរតាមតណ្ហា


រៀនរកឧបាយដោះស្រាយបញ្ហា កំនត់វាសនាម្ចាស់ការខ្លួនឯង ៕
































បទពាក្យ ៨


ជីវិតសត្វលោក


១ ជីវិតសត្វលោកគឺមិនដែលទៀង ប្រៀបដូចទឹកភ្លៀងបក់បោកតាមខ្យល់


ជួនជួបក្តីសុខជួនទុក្ខកង្វល់ មិនអាចហ្នឹងថ្កល់នៅស្ថិតស្ថេរបាន ។


២ កើតហើយតែងតែវិវត្តន៍ប្តូរផ្លាស់ ជរាឈឺចាស់នឹងស្គមស្គាំងប្រាណ


ឆាកជីវិតពិតកំណត់មិនបាន ជួនជួបថ្កើនថ្កានជួនរងវេទនា ។


៣ មានជិពជន្មហើយរមែងស្លាប់បង់ សល់តែផេះផង់លើពសុធា


ជួនជួបជួនព្រាត់រាល់ពេលវេលា មនុស្សគ្រប់អង្គាមិនអាចកំណត់ ។


៤ មានតែកុសលគឺផលបុណ្យទាន អាចធ្វើជាយានយ៉ាងពិតប្រាកដ


ដឹកនាំជីវិតឲ្យផុតជូរចត់ លែងរស់កំសត់លើវដ្តសង្សារ ។


៥ តែមនុស្សសព្វថ្ងៃវិស័យកិលេស លោភ:ចាក់ច្រែសនៅក្នុងចិន្តា


ចិត្តវង្វេងជ្រប់ងប់និងតណ្ហា ភ្លេចទាំងសីលាលែងបដិបត្តិ ។


៦ ខំប្រឹងហោះហើរដើរតាមចំណង់ មិនសូវផ្ចិតផ្ចង់ប្រុងប្រៀបប្រយ័ត្ន


ឈ្លក់និងសប្បាយក្លាយគ្រោះខ្ចាយខ្ចាត់ គ្មានពេលស្ងប់ស្ងាត់ក្នុងភពលោកិយ ។


៧ សម័យទំនើបទើបលាស់ដុះត្រួយ មនុស្សខំបោះពួយគ្មានត្រាប្រណី


ដួងចិត្តស្រើបញ័រភ្លេចធម៌ជិនស្រី វិលវក់ស្មារតីលែងគ្នាន់គ្នេរគិត ។


៨ ជ្រមុលជ្រមុចក្នុងជុចមោហ: ដិតដាមប្រឡាក់ក្នុងភពជីវិត


រឿងបុណ្យសីលទានគ្មានចង់ប្រព្រឹត្តិ បេះដូងនេបនិត្យតែល្បែងស្រីស្រា​។


៩ ផឹកស៊ីសប្បាយក្លាយជាគុំគួន ចង់ឈ្នះរៀងខ្លួនមាំមួនហានក្លា


កើតជាទំនាស់ទាស់ទែងហឹង្សា ឥតមានមេត្តាដល់គ្នានិងគ្នា​ ។


១០ យកធម៌ទោស:ដាក់ក្នុងដួងចិត្ត ប្រព្រឹត្តិឧក្រិដ្ឋចងចិត្តពាធា


ធ្វើរឿងអាស្រូវផ្លូវអធម្មា ចង់ឈ្នះមួយគ្រាមិនគិតវែងឆ្ងាយ ។


១១ ព្រោះក្តីច្រណែនភ្លេចអស់ព្រះធម៌ ឈ្នានិស្សលាបពណ៍ពោលពាក្យលេបខាយ


ទីល្អមិននៅចង់ទៅអបាយ ឆួលក្តៅក្រហាយកាយចិត្តមានះ ។


១២ ទោះអាក្រក់ល្អក៍លែងគិតដល់ ចិត្តជ្រួលច្របល់ខ្វាយខ្វល់ចង់ឈ្នះ​


ដើរតាមផ្លូវមារវារចាកផ្លូវព្រះ ក្នុងទ្រូងកកស្ទះដោលក្តីខឹងក្រោធ ។


១៣ ហេតុចង់មានហ៊ានធ្វើមនុស្សជ្រៃ ភ្នែកមិនរំពៃលៃមើលមនុស្សត្នោត


ប្រឹងតែបង្វែងខ្លែងបោកបញ្ឆោត ទោះបាបរាប់កោដិចិត្តសោតឥតក្រែង។


១៤ ខំរកឥតឈប់បង្រ្គប់លោភ ចិត្តជាប់ជុំពាក់វិលវល់ដូចផ្សែង


ស៊ូបំផ្លាញគេដើម្បើខ្លួនឯង ខាខាំងហួងហែងស្វែងរកយប់ថ្ងៃ ។


១៥ បេះដូងរញ្ជួយព្រួយខ្លាចក្រក្សត់ មុតមាំអំណត់ប្រិតប្រៀងកែឆ្នៃ


រកតាំងពីរស់រហូតក្សីណក្ស័យ តែក្តីស្រមៃនៅមិនគ្រប់ឡើយ ។


១៦ ជីវិតសត្វលោកជាប់ជោគដោយទុក្ខ ថ្ងៃនេះថ្ងៃមុខរងទុក្ខឥតស្បើយ


កិលេសរួមរិតជុំជិតអស់ហើយ ជីវិតកលកើយលើខ្នើយទុក្ខា ។


១៧ សព្វមនុស្សខ្នះខ្នែងស្វែងរកសុខសាន្ត តែបែរឥតស្រាន្តរិតតែខ្លោចផ្សា


ត្បិតស្វែងរកសុខលើភពទុក្ខា មិនដឹងថ្ងៃណាបានសុខឡើយ ៕